Palačinke od heljdinog brašna vole mnogi jer su zapravo zdravija opcija u odnosu na one klasične, odlične su za one koji brinu o liniji jer ne goje, a vrlo su ukusne.
Palačinke od heljde će biti sjajna poslastica ako ih poslužite uz grčki jogurt i bobičasto voće sa javorovim sirupom ili malo meda.
Jedna porcija (bez jakih preliva) ima oko 170 kalorija, pet grama proteina, oko 25 grama ugljenih hidrata (od toga dva grama šećera), zatim šest grama masti (od kojih dva grama zasićenih), pola grama vlakana i oko gram soli.
Sastojci:
4 pune kašike heljdinog brašna
4 pune kašike integralnog brašna
1 i po kašičica praška za pecivo
prstohvat soli
1 jaje
150 ml mlijeka po želji
1 kašika maslinovog ili biljnog ulja po želji, plus za prženje
Za posluživanje (po želji) sirup od javora, jogurt, bobičasto voće, maline
Priprema:
Prosijte brašno, prašak za pecivo i so u posudu za miješanje. U posebnoj posudi umutite jaje sa mlijekom i uljem dok se dobro ne umiješa. Dodajte tečne sastojke suvim sastojcima i miješajte dok se sve lijepo ne sjedini.
Zagrijte tavu na srednje jakoj vatri, pa dodajte malo ulja. Onda tavu pažljivo obrišite ubrusom.
Sipajte smjesu kutljačom u tavu, ali tako da palačinke budu za nijansu deblje od onih od klasičnog brašna da ne bi pucale.
Pržite sa obje strane po oko 45 sekundi, odnosno dok ne počnu da se lijepo odvajaju od tave, prenosi “Zadovoljna“.